زغاريف !!!

اية زغاريف دى ؟ .. اكيد كل الناس منتظرة الاجابة على السؤال ده على اعتبار انه هو السؤال الوحيد اللى ممكن يخطر فى بال اى حد وصل للمدونة هنا وهو يعنى اية "زغاريف" ومن حقكم على الراجل بتاع الزغاريف دة انه يوضحلكم يعنى اية الكلام الغريب دة يعنى اية زغاريف سواء من ناحية المعنى اللفظى للكلمة او من ناحية المعنى اللى بيقصدة هنا وهيكون محل استخدام كتير فى كل حاجة هكتبها, يلا بقى تعالوا نرغى ونشوف القصة اية . زغاريف هى جمع "زغروف" الله على الكلام ... اوعى وشك طبعا فى احساس بالتميز دلوقتى وكمان ممكن تلاقى فى احساس كدة بالبلاغة الأدبية اللى ملهاش مثيل وبالتأكيد برضو فى ناس بتكلم نفسها دلوقتى وبتقول "ياشيخ !!! دا انت جبت
الديب من ديله قال زغاريف جمع زغروف" بس لو صبر القاتل على المقتول كان اتزغرف لوحدة. الزغروف لفظ عامى جدا من ضمن الفاظ كتير جديدة على مجتمعنا ولكنة غير متداول بين كل الناس بصورة عامة ولكنة متداول بين شريحة معينة من الشباب واكيد مقصدش الشباب الهيكى ميكى اللى بيروح ويجى الشباب بتوع دادى ومامى والحركات دى لأن الالفاظ دى من وجهة نظرهم الفاظ بيئة تحن "مش طحن" وساعات تبقى عيب وكخ ويع والحاجات الكتير اللى تجيب المرارة دى, انا بقصد الشباب اللى بيمثلوا الشريحة المتمرمطة فى البلد دى ودول منهم كتير قوى, نرجع للفظ زغروف تانى علشان نحط التعريف الصح ليه ونقول ان الزغروف هو "الحاجة الصغيرة فى الحجم بس فى نفس الوقت المركزة جدا جدا" يعنى تقدر تقول بالبلدى كدة كبسولة زى كبسولة الدوا كدة وفى ناس بتقول عليها حاجة تانية خالص المهم انها على الرغم من صغر حجمها الا انها بتدى مفعول قوى ومضمون ومعنى قوى جدا.

ولو حضرتك من الناس اللى بتركز فى كلام الأفلام وغاوى ايفهات هتفتكر معايا دلوقتى اول ظهور لليمبى فى السينما من خلال فيلم الناظر صلاح الدين وتحديدا لما صلاح ابن الناظر "علاء ولى الدين" هو واتباعة راحوا لليمبى علشان يعلمهم الأنحراف وكانت المفاجاة ان فرح الليمبى النهاردة وبعد حوار دمة خفيف بينهم لدرجة ان الواحد جاله هس هس لمجرد ان الليمبى يفتكر مين صلاح اصلا وفى النهاية يقوم الليمبى يرحب بضيفة والناس اللى معاه ويعزم علية بطبق مليان كوكتيل من ارقى انواع المخدرات بس صلاح ابن الناظر رفض بس الليمبى حب يأكد ان العزومة مش عزومة مراكبية فقالة "طب اضربلك زغروف" وهتلاقى الزغروف اللى هو يقصدة دة عبارة عن سيجارة نونو كدة مش بحجم السجاير المتعارف عليها بس الزغاريف دى فيها الخلاصة دايما وفى المشهد دة كان اول ظهور للزغروف فى السينما العربية.

لكن هنا لما قررت انى استخدم المسمى القوى ده فأنا اقصد انى هقدم هنا الزغاريف اللى كلنا بنتعرضلها كل يوم فى حياتنا ومع الوقت هتكتشفوا ان انا وانت وانتى وكلنا بنقابل زغاريف فى يومنا العادى بس درجة تركيزنا فيها مش كبيرة وساعات بنشوفها حاجات عادية جدا, يعنى مثلا حضرتك فى شغلك كل يوم لازم تاخد زغروف عالريق وطبعا كلة كوم وزغاريف المواصلات كوم دا بالأضافة الى ان حضرتك ممكن تصحى من النوم على زغروف من جارك اللى سهران معاك طول الليل وعمرك ما تتوقع انه يجى منه اى زغروف اصلا, يا جماعة افهموا بقى فى زغاريف طايرة فى الهوا وفى كل مكان بس انتوا مش واخدين بالكم. اتمنى ان معنى الكلمة يكون واضح دلوقتى واننا نكون متفقين ولو فى مجال لأى اسئلة أكيد مش هتردد فى انى اجاوب عليها فى حدود معرفتى ومعلوماتى عن الزغاريف, ومحدش يقولى ان الزغاريف حاجة عبيطة او تافهه لدرجة اننا مش لازم نهتم بيها لأن الفكرة ببساطة انك لو ركزت فى كل زغروف صغير وحاولت تشوف فيه وجهة نظر حياتية هتلاقى انك لو قدرت تغير وتاخد موقف من كل زغروف صغير فا بالتالى فى حاجات كبيرة هتتغير, يلا بقى نتابع مع بعض الزغاريف اللى ربنا هيقدرنى واقدر اتكلم عنها هنا واللى بالتأكيد مقررتش انى اكتب عنها الا علشان انها مسببالى مشاكل فى دماغى وفى النهاية ادينا بنرغى وبنفضفض احسن ما نطق من كتر الزغاريف اللى بنضربها.

يلا بقى بسرعة "اضربلك زغروف" .

قهوه بلدى مدونه حياتية ثقافية تكنولوجية لها عيون ترصد وتنقل لك كل جديد ومفيد