التوكتوك زغروف بـ 3 عجلات

اول زغروف هنتكلم عنه هو التوكتوك لأن فى كتير من الناس فى مصر حلم حياتهم انهم يركبوا التوكتوك من باب التجربة علشان يشوفوا هو التوكتوك دة عبارة  عن اية والأحساس وانت جواه بيبقى ازاى, دول طبعا الناس اللى شايفاه الموضوع من منظور ان التوكتوك حاجة كدة جاية من الملاهى او زى ما بيقولوا حاجة "واااو" وفى ناس تانية كل يوم بتروح مستشفيات من كتر عشقها للتوكتوك ودول بقى اكتر من الناس اللى اتكلمت عليهم فى الأول ومنهم ناس مقربين ليا انا شخصيا فى التجربة الأولى والاخيرة ليهم مع التوكتوك استمتعوا جدا لدرجة وصلت لشرخ فى وش قدم الست الكبيرة وعدد اربع غرز فى راس طفل عمره 3 سنين بالأضافة لحالة خوف وهلع لأنسة محترمة فى سن جواز , بس لحظة احنا مش لازم نظلم التوكتوك فى كل دة على الرغم من انه فى الحادثة دى تحديدا رشق فى نص عربية زى السهم الذهبى لكن دا مش معناه اننا نحكم علية انة مفيهوش أمن وأمان أو انة مثلا مش مطابق للمواصفات لسمح الله, لأ طبعا مين يقدر يقول ان التوكتوك مفيهوش أمان ؟؟ مين المجنون اللى قال ان التوكتوك كوسيلة مواصلات مصمم بشكل مفيهوش اتزان وثبات على الأرض ؟؟

بصوا بقى معايا وركزوا شوية بالنسبة للناس اللى اتعاملت مع الاختراع اللى اسمة توكتوك دة من قريب اكيد هيفهموا اما بالنسبة للناس اللى محصلهمش الشرف لسة فاهوضحلهم نقطة مهمة جدا وهى ان التوكتوك بيتحرك على 3 عجلات متوزعين على شكل مثلث بحيث تكون واحده قدام واتنين ورا والتصميم الخرافى دة بيديلة قدرة على الأتزان فوق ما تتخيلوا لأنه طبعا بيخليه يتمتع بنظام تعليق أقوى من نظام التعليق اللى نزلت بيه مثلا الــ BMW فى "X6 " او غيرها من الحاجات الغريبة دى. يعنى فى أى ملف يمين او شمال هتلاحظ ان التوكتوك بيلف هو واللى سايقه واللى راكبة دا بالأضافة ان بعد كل دة بتلاقى الدنيا كلها بتلف فى الاخر, وبعدين تعالوا هنا بقى وخلونا نتخيل لو حضرتك اللى سايق التوكتوك دة وفجاة لقيت زغروف اسمة بلاعة قدامك ........……… هتعمل اية ؟؟

الطبيعى جدا انك هتتفاداها لكن فى اللحظة دى احساس اللى سايق بيكون كأنة سايق عجلة او موتوسيكل لأن اللى هو شايفة عجلة واحدة وبالتالى هيفادى البلاعة بالعجلة اللى قدام وهيكون نتيجة دة ان الناس اللى ورا هتعانى من البواسير فى أقرب بلاعة قصدى فى أقرب فرصة, بجد حاجة غريبة فعلا انك تركب حاجة بتمشى على 3 عجلات ومفيهاش اى نوع من انواع الأستقرار ولا الأمان ناهيك بقى عن حرفنة السواقين فى المجال دة واللى ممكن يوصل لدرجة التباهى "بص يا حسنين انا بمشى التوكتوك على عجلتين وساعات بمشيه على ضهره" وناهيك برضو عن اطقم الصوت الغريبة والاغانى الأغرب, وسيبك من دا كله وركز فى شوية الحكم والعبارات القاتلة اللى بتتكتب على ضهر التوكتوك من قبيل "أنا الكينج ياله" و"الحلوة كيداهم" أو مثلا "روتانا توك توك مش هتقدر تمشى على رجليك" وخد بقى اخر حاجة دى "شغل المساحات وعاكس البنات" وعلشان كدة ستر ربنا سبحانة وتعالى هو السبب الوحيد فى استمرارية التوكتوك دة فى مصر وفى كتير قوى هيتقال فى عالم التوكتوك اللى فعلا بيعتبر من اكبر زغاريف حياتنا.

قهوه بلدى مدونه حياتية ثقافية تكنولوجية لها عيون ترصد وتنقل لك كل جديد ومفيد