ضل راجل و لا ضل حيطة

جلست بعض السيدات فى النادى فتحدثت سيده وبدأت تخطب فى وسط سيدات النادى قالوا زمان ضل راجل ولا ضل حيطة .... باختى بلا نيلة, مين فى الزمن دة يقول الكلام دة !!! حد فيكم سمع عن حيطة طول الليل بتشخر لدرجة انك متعرفيش تنامى ؟ او حيطة لما تدخل من باب البيت تجعر عايزة الغدا واكيد هيكون يوم ملوش حل لو الملح طلع زيادة شوية فى البامية, طيب حد فيكم شاف حيطة تملا سقف البيت دخان والارض اعقاب سجاير, طيب بلاش كل دة حد فيكم تخيل انة ممكن يرجع البيت يلاقى الحيطة بتبوس فى الشغالة,او حيطة طول الليل بتتكلم فى موبايل وانتى مش عارفة هيا بتكلم مين ؟ او حيطة من الشغل للقهوة ومن القهوة للشغل ؟دا على الاقل اى حيطة بيكون معروف مكانها طول الليل لكن الحيطة اللى بنقصدها هدوخك وراها عشان تعرفى بس هيا كانت سهرانة فين طول الليل وابسط اجابة تسمعيها ان الحيطة كان عندها شغل,تقبلى ان حيطة تقولك مفيش خروج بالفستان دة ولما تطلبى منه فلوس عشان تجيبى غيرة متلقيش غير ودن من طيب وودن من عجين مع ان الحيطان ليها ودان .