ظهور المعلم حطاطا

بالتاكيد مفيش اى سبب ممكن يخلى الماوس بتاعك يتحرك ويدوس على عنوان التدوينة دى بالتحديد علشان تعرف قصة المعلم حططا اللى وصل وعملنالة زفة فى قهوه بلدى غير ان العنوان بيديك احساس ان المعلم حطاطا دة ممكن يكون شخصية تاريخية انت مسمعتش عنها قبل كدة او ممكن كمان انك تفكر انها سقطة تاريخية وقعت منك فى كل كتب التاريخ والجغرافيا والطبخ والتدبير المنزلى كمان, اوعى تنكر دة مع العلم انة ممكن يكون اى سبب تانى الله اعلم بيه كل دة مش هو المهم حاليا المهم حاليا هو بناءا على عنوان التدوينة فاحنا بنعتبر ظهور المعلم حطاطا دة حدث وواضح انه من الاحداث اللى مش بتاخد حقها زى احداث تانية كتير وبناءا على ماسبق بان ظهور المعلم حطاطا فى عصر الانترنت
الهوائى والارضى وكل شئ ان كان “ كليشنكان-احد مصطلحات الجالية المصرية فى الشارع المصرى” فالأهم حاليا هو التعرف على صاحب الحدث نفسه ودا طبعا اللى هنعرفة فى السطور القادمة,المعلم حطاطا هو العبد لله صاحب قهوه بلدى او تقدر تقول الراس الكبيرة لكن بغض النظر عن الألقاب اعرفكم بالمعلم حطاطا بالتفصيل وعن قرب واية فكرة ظهوره فى قهوه بلدى وعدم ظهورة فى اى كتاب من كتب التاريخ …

اشمعنى حطاطا !!!؟

… المعلم حطاطا فى عرف الأنترنت لا يعتبر اكتر من لقب او اسم مستعار “نيك نيم- بلغة الشباب الهاى فاى” كان بيستخدمة اخويا الصغير لكن مش القصير فى شات مصرواى فى قديم الأزل فى ايام كان فيها شات زى مصراوى يعتبر طفرة فى عالم تكنولوجيا السايبرات فى مصر والوطن العربى مش زى دلوقتى حيث طفرة البالتوك والانسبيك حيث الشات بمفهوم الصوت والصورة ومفهوم عالم ديزنى وبالتاكيد شباب جيلى محدش فيهم مجربش الشات دة ولو حتى مرة واحده, ومعتقدش انها مشكلة ابدا ان المعلم حطاطا يبدا يظهر تانى النهاردة عشان يكون هو الشخصية اللى هتتداول معانا هنا سلسلة تدوينات من نوع خفيف وطريف مش هيكون الهدف منها مجرد التسلية فقط لكن المعلم حطاطا هينقلنا حاجات من واقع الشارع المصرى اللى كلنا عايشينة بالحلو والمر دا ابالاضافة لأحداث القهوه وعالمها اللى كل يوم فى جديد, ممكن كمان يناقش معانا كتاب او ستكلم عن احساسه بصوره وممكن كمان يكتب خواطر وممكن يحكى حدوتة فى عالم حطاطا كله متاح,وطبعا لازم ننوه ان المعلم مش شرط يكون بنفس هيئة وفكر معلم القهوه اللى اتعودنا نشوفه فى التلفزيون والسينما بس اكيد فى نقاط تشابة ونقاط اختلاف لأن فى عام 2010 كل حاجة اتغيرت حتى المعلمين بقى ليهم ثقافتهم الخاصة بيهم وبالتاكيد الثقافة دى لازم تكون ديجيتال فى بعض الأوقات, المعلم حطاطا عمره ما هيكون لية وجود بدون تفاعل منكم معاه لأنة فى النهاية بشر زيكم كل الفرق اللى هيكون موجود هنا انه ممكن يخبط على ابواب جديدة وخفيفة ممكن يكون مفيش حد قرب منها قبل كدة وملامحه هتترسم على ايديكم تقريبا ويا رب تتقبلوه بينكم ويكون على قدر المسئولية .