افوره 2

السيجاره : مالك ... ساكت ليه النهارده ؟ .... مش عادتك يعنى ...انسان : ويا ترى ايه الى ممكن يتقال فى ظروف زى دى ....عادى يعنى .... مش لقى شئ جديد ممكن يشجعنى على الكلام ....السيجاره : ( ضاحكا بستهزاء ) ايه موضوع الدش منفعش .... ولا حاسس انك فاشل كالعاده ..... انسان : يمكن اكون فشلت .... انما الاكيد انى اتعلمت تانى .... السيجاره: معتقدش ان الى زيك ممكن يتعلم ..... انسان : يموت المعلم ولا يتعلم ..... ولا ايه ؟السيجاره: طيب ايه الجديد فى حياتك ؟ انسان : ما قولتلك مفيش جديد ... السيجاره: خلاص متزعلش نفسك كده ..... بلاش الجديد كلمنى عن القديم انسان : اتكلم اقول ايه ولا ايه ...؟ السيجاره : قول الى انت عايزه .... فى الحالتين مش هتلاقى غيرى ونيس ليك ..... ده غير ان اسرارك بتطيرمع دخانى ........ عيش ومتفكرش .... انسان : وده الشئ الوحيد الى بيخلينى اتكلم معاكى بحريه اكتر وبدون تفكير ...

ان كل كلامى ليكى .. مجرد دخان واوهام .. بتطير مع دومات الهواء
السيجاره: وفر على نفسك التعب .... شد منى بقوه ...

وانفخ فى الهواء ........وعيش لحظه جبروتك بصدقوا.....
وانت بتنفخ الدخان ..........غمض عنيك واحلم .......

وقولى شايف ايه
انسان : يا ا ا ا ا ا ا ا ا ا ا ا اه ..... الليل .... المطر .... الشوارع فاضيه .......

ريحه الهواءبعدالمطر ليه عطر تانى .......لم بيدخل جو منى .......
بحس انى ملك زمانى .... عيونها الى بتبص من وراء الشباك الازاز ....
ولهفتها ليه بعد ما تسمع صفارتى العاليه الى بتصحى كل الجيران ....

وعودها ليه بالاخلاص وانى افضل حبيبها فى كل وقت وفى كل زمان .....
فراقها ليه وهى بتضحك ... وانا قدام عنيها مجرد بقايا انسان .....
يا ا ا ا ا ا ا ه ... شوارع فاضيه .. ومحدش صاحى فى البلد غيرى ......

وكل قهوه او ناصيه شارع افوت عليها اسمع صوت عالى بيقول ......

( اتفضل يا فنان ) ..... ناس طيبه .... طيبين قوى

من ايام جدى وجدك والفانوس الصاج ابو شمعه بتاع رمضان ....

عم احمد.. وابو مينا ..مش فاقه مين مع الهلال ومين مع الصلبان ...

الدين لله يا بشر ...
وربنا ديما فى الوجدان ....احلام كتير ومنسيه ....
السيجاره : حمار ... هتعيش حمار وتموت حمار .....
انسان : يمكن يكون عندك حق .... بس ليه ؟
السيجاره : احلامك الورديه .. وميولك العاطفيه لازم تديها اجازه شويه .....

علشان تقدر توصل للقمه والانجاز .... لازم تدوس على كل الناس...
انسان : مش فاهم ...!
السيجاره :علشان حمار ... فاكر اول مره مسكتنى فيها ودوقت طعمى .. ؟
انسان : طبعا فاكر ...
السيجاره : شعورك كان ايه ؟
انسان : شعور جديد وغريب ... معشتهوش قبل كده ...
السيجاره: وبعد ما شربتنى واستمتعت بطعمى ... عملت ايه ؟
انسان : دوست عليكى بجزمتى .....
السيجاره : شعورك كان ايه ... ؟
انسان : حريه ... انطلاق ... سلطانى زمانى انا .....
السيجاره : تبقى حمار ولا لاء ... لم يكون معاك السر فى انك توصل للقمه بسهوله.....

وديما باصص لتحت رجليك وعايش على حطام الماضى والذكريات واوهام مستقبليه ...
اصحى وفوق لنفسك ....... يا اسير السكات .......
انسان : لو كلامك صح ... يبقى مفرقناش كتير عن الحيونات .....

ولتحيا الكلاب رمز الوفاء والاخلاص .... وليسقط السحلب المكار وكل مشاريب القهوه
والسحلب فات فات وفى ديله اربع كدبات ... ياله قولى معايا ....
السيجاره: التعلب فات فات وفى ديله سابع لفات
انسان : ( يغنى ويصرخ بصوت عالى فى هستريا ) السحلب فات فات وفى ديله اربع كدبات ....

السحلب فات فات ..... وفى ديله اربع كدبات

امين شرطه : هوبقالوا كتير على كده ؟
امين شرطه 2 : من ساعت ما جه امبارح بالليل
امين شرطه : الواد ده شكله شارب ديناميت ومفجر دماغه
امين شرطه2 : ده اكيد واخد حبوب هلوسه ... انت مش شايف الى بيعمله ولا ايه ...؟
امين شرطه :ما علينا دول باقى المحاضر الى هتتعرض على النيابه ...

سلام بقى اصلى واخد المدام سينما النهارده وكده .....
امين شرطه2 : هتدخلها فيلم ايه ...؟
امين شرطه2 : والله بعد تفكير عميق وشديد فى ظل ظروفنا اليومين دول المدام قررت اننا ندخل فيلم
( البلد دى فيها حكومه ) علشان تحس انها زوجه رجل مهم
امين الشرطه : بالشفاء ..... قصدى بالسلامه يا بيه .. وسهره سعيده

انسان : التعلب فات فات وفى ديله اربع كدبات
مسجون : ايه يا جدعاااااااان الهنا الى احنا فيه ده ....

احنا لم اتمسكنا على القهوه اتمسكنا مخدرات مش تخلف عقلى ...
يعنى المفروض اننا فى قسم الشرطه مش العباسيه .....

الى بيحصل ده فى اهانه لينا ...
وانا مش هسكت وهبعت شكوى للسيد المشلول ... قصدى المسئول
انسان : هو حضرتك بتزعق ليه ؟
مسجون : حضرتى .... ده على اعتبار انى واقف قدامك بطربوش وبدله وببيون وشراب مقلم...

بقالى 12 سنه من سجن لسجن ومن قسم لقسم ...موردش عليه كده ابدا
انسان : ويا ترى ايه هو الى موردش
مسجون : مهو يا امه انت عبيط .... ومكانك فى العباسيه مش هنا ...

يا امه انت بتشتغلنا وفى الحالتين هتضرب لحد ما يبان ليك اصحاب .....

حد فيكم يعرف الواد ده ...؟
المساجين : ولا عمرنا شفناه ...
مسجون : يبقى هتضرب .... انت ياض من ساعت ما جيت امبارح وانت قاعد لوحدك فى ركن ...

وعمال تولع سيجاره ورا سيجاره ... وكل سيجاره تولعها تفضل باصص ليها وعمال تتكلم معاها ...

لحد ما خلصت سجايرك كلها ... قولنا ماشى بيحصل .... انما ترسم سيجاره على الحيطه ...

وتقعد تتكلم معاها وكأن الى قاعدين معاك وحوليك عالم هفاء وملهمش لزمه ........
طلع الى فى جيبك ياض ... ولا اقولك اقع هدومك ....
انسان :لو سمحت بلاش غلط او استعمال للعنف من فضلك ....
مسجون :حاضر يا عم الشريف والبرئ .... وان شاء الله جاى فى ايه سرقه ولا دعاره ؟
انسان :جاى فى تاكسى وعندى استشاره... ومروح على طول ...
مسجون : ده على اعتبار انك نازل فى فندق خمس نجوم ...

انت هتشتغلنى تانى ... طيب خد ... بووووووووووووم
انسان :( يصرخ من الام الضرب ) ااا اااااااااااه انتو يا جدعان يالى برااااااااااه

خرجونى من هنا ملعون ابو الى يقول فلسطين او العراق ...
طذ فى كل شئ من بلدنا ... طذ فينا احنا شخصيا .....بس خرجونى من هنا
مسجون : اصرخ لحد بكره الصبح محدش هيسمعك
انسان : خلاص يا بشوات ... والله حرمت ... معنتدش همشى فى فى مظاهرات ....

بس كفاااااااااااااااااايه حرمت خلاص خرجونى من هنا ...

ااااااااااه ... كفااااااااايه

عسكرى 1 : الصوت ده جاى منين ؟
عسكرى 2 : شكله من قفص رقم 4
عسكرى 1 : معاك ولاعه اولع السيجاره دى ؟
عسكرى 2 :اسف يا معلم ؟
عسكرى 1 :طيب معاك كبريت اولع بيه
عسكرى 2 :برده لا ....
عسكرى 1 : خلاص مش لازم سجاير .... اطفى الشمعه ونام ..؟

human night

تابعوا قهوة بلدى دائما