اللهم اديلوا طحينه

بعد يوم متعب فى القهوة قررت انى انعنش نفسى شوية بعيد عن زحمة القهوة وبالتالى كان القرار انى ادردش شوية مع صديقة اعتز بصداقتها فعلا ... اتكلمنا فترة كويسة وطرحنا كذا موضوع اتناقشنا فيهم كان من ضمنهم سؤال تأثيرة عليا زى تأثير الدش البارد مع ان السؤال لا هو جديد ولا هو غريب بس التأثير دة كان نتيجة انى تقريبا من يومين كنت بفكر انى افضفض شوية هنا معاكم فى القضية دى .

اكيد الناس بتقول اية البنى ادم اللى بيتكلم كتير دة ما تقول يا سيدى اية هو السؤال وتخلصنا .من غير عصبية السؤال كان ...

اية رأيك فى الحجاب والبنت المحجبة ؟

شفتوا السؤال تقليدى ازاى ؟ بس السؤال جعلنى استرجع موقف عشتة مع صديق من اصدقاء القهوة فعلا وكان المشهد كالتالى ... قاعد عالقهوة الساعه اللى بتفك فيها عن نفسك كل يوم انت بتشرب شاى وصاحبك بيعانق الشيشة كانها قصصة الحب الوحيدة اللى عاشها فى حياتة تحس كدة ان فية غرام بينهم وبيضرب نسكافية طبعا قاعدين على ترابيزة مميزة من اللى بيتحجزوا لكبار الزوار او الزبون المستديم كل حاجة طبيعية الناس رايحة جاية وفجأة ( ادخل بموسيقى تصويرية ) تلمح فى عيون صاحبك علامات ازبهلال ودة لفظ دارج ينم عن الدهشة وتركز فى الازبهلال فى عينية تلمح بنت ممشوقة القوام الجمال عادى مش مستفز محجبة وكل دة طبيعى .

اللى مش طبيعى بقى هو ان الحجاب واخد حقة فعلا فى منطقة الراس والاكتاف واوعااا تفكرر تنزل لتحت لان كل ما هو اسفل الكتف لا يتماشى ابدا مع ما هو اعلى الاكتاف .

فى اللحظة دى وبعد ما ترجمت الوصف دة قدرت اعرف بالظبط اية سبب ازبهلال الراجل اللى قاعد معايا ......... وابتدى النقاش بجملة على سياق جملة محمد هنيدى فى احد افلامة لما قال ( حد يوسع البناطيل الحريمى دى ) فعلا حاجة غريبة وملفتة للانظار ازاى ممكن دة يتماشى مع دة .

طيب بصورة تانية اية التناقض الغريب اللى احنا بقينا نشوفة فى مجتمعنا دة ؟ يعنى اية بنت محجبة وفى نفس الوقت مفيش اى حاجة فى اللبس بتاعها الا وهيا هيا بتنم عن فتنة بكل المعانى .صحيح ان الحجاب عمرة ما كان مقياس او ترمومتر اساسى لاخلاقيات البنت فى زمن العجايب دة يعنى بلغة تانية مش معنى ان بنت محجبة لابسة الحجاب تبقى اخلاقها ومعرفتها بدينها واساسياتة والتزامها بيها شئ مؤكد والعكس صحيح مش معنى انك تشوف بنت مش محجبة دا معناه انها من غير اخلاق لان مقاييس الزمن دة بقت زى الفخفخينا ويمكن اللى مش محجبة اوقات كتير تكون افضل .

كل الغرض من الموضوع مش اننا نناقش قضية المحجبة واللى مش محجبة لانها حاجة شخصية فى المقام الاول لكن عايزين نلفت نظر المحجبات تحديدا لحاجة مهمة جدا وهيا انهم يرحمونا من التناقض اللى هما فية وبينعكس عليهم بصورة سلبية يمكن محدش يحسها فى سلوكيات الناس المحيطة بيهم لكن لازم يكونوا متاكدين انها نقطة نفسية ممكن تقف بينهم وبين ناس تانية كتير .

محجبة يعنى بتعرف معنى كلمة حجاب واية هيا الحاجات اللى بيفرضها عليها وتلتزم بيها اما غير المحجبة بقى فدا موضوع تانى وهناك فرق بين هذا وذاك وكأننا فى زمن الكاسيات العاريات .

المشكلة بقى ان الحوار انتهى بصورة لا ترضى اى طرف فيا لانة فى الاخر قال سيب الخلق للخالق وربنا يلطف بينا فى زمن بقت الحياة فية ديجيتال وكان اخر تعليق صدر منة تقريبا الاب والام فى 2008 بقم هما كمان ديجيتال .

أخر حاجة عايزين نقولها ان كل الكلام دة ما هو الا راى شخصى ولا يحتم على اى حد يقراة انة يتوهم اننا بننقل صورة غلط .. بالعكس دى حاجات عايشينها فى الواقع بتاعنا كل يوم واليكم الدليل ...