اشمعنى قهوة بلدى

اول موضوع حكتبة النهاردة حيكون متعلق باسم الموقع .. لية قهوة بلدى ؟ لية مش كوفى شوب مثلا زى ما ولاد الناس بيقولوا او كافية مثلا ؟
ممكن اسيب الخيال لكل واحد فيكم يقرا الموضوع دة انة يلاقى الاجابة بنفسة بس دا ميمنعش انى ابعبر عن نفسى وعلى فكرة ابعبر دى مش غلطة لا دى مقصودة لان القهوة البلدى هيا المكان اللى بيعبر فية الشباب لبعضهم بدوت اى قيود او تقيد ببرستيج ومنظر عام والحاجات دى ... احنا بعيد عن كل دة احنا بنفضفض لكم وانتوا تفتضفضولنا ولا مانع من اى حاجة مهما كانت الا ما يسئ لدينا وقيمنا واخلاقنا .ولان كمان القهوة دى بصراحة مظلومة قوى فى الزمن دة لانها زمان كانت بتبقى مكان كل الناس بتعتز انها تكون موجودة فية لانها بتقابل الناس اللى بتحبهم وبتشاركهم مشاكلهم وهمومهم وافتكر فيلم زى فيلم الكرنك كان مثال كويس لماهية القهوة لكن دلوقى بقت هيا الشماعه اللى كلة ممكن يعلق اخطائة عليها مقابل تجنب مصطلحات تانية زى البطالة والفراغ وقلة الحيلة والاحباط والحاجات دى بقى زى ما نكون سبنا الراس وبنمسك فى الديل على الرغم ان القهوة دى هيا المكان الوحيد اللى ممكن تشوف فية كل الاعمار من الشاب الصغير لحد الشيخ العجوز اللى مش قادر حتى يرفع كباية الميه على عكس اى مكان تانى تحت اى مسمى بالتصنيفات الغريبة اللى بقينا نسمعها اليومين دول .

اول حاجة نشوف الناس عايزة تشرب اية فية سخن وفية ساقع وفية حاجات تانية كتير حتى الدخان موجود شيشة تفاحة ولا كريز على كل لون تلاقى عندنا وبكل النكهات .
المهم زى ما بيقولوا حتى الكلام مناولة مش مقاولة يعنى زى ما انا بتكلم اكيد ححتاج اسمع ولو حتى تعليقات او انتقاد ان شالله حتى هجوم وفى الاخر كلة بيكون بصورة ايجابية عليا وعليكم ومش معنى انى صاحب القهوة انى مدفعش لا انا احب النظام ولا محسوبيات خدلك كرسى واقعد ونتكلم .
وعلى فكرة انا حنقلكم صورة حية من بعض الحاجات اللى بتحصل على القهوة ويمكن تلاقو شخصيات حتعيش معانا من غير ما حد فيكم يشوفها او حتى يلمسها بس حنحسها .
اتفضلوا اشربوا حاجة .....